مختارات

يا بحر

جمعة الحلفي

                      كلما دققت بالبحر.. قلتّْ حيلتي

يا بحر..

جاي اصلي لك وأصوم

جاي..

من غبرة حروب وظلم حكام

جاي أحط راسي عله صدرك

وأغفى ساعة من الهموم

يا بحر..

جاي أصلي بحضرتك

                        وأعلكـ لموجك شمع

جاي.. جايبلك من أهلي علامة

حفنة تراب ودمع

جاي وثيابي تكطر دم

كصة الحجاج بينا يا بحر

وأنتَ عطاب ونبع

يا بحر..

جاي أفرش همومي عله شاطيك ونام

جاي أطش حزني عله رمالك وأشتيكيلك

جاي أشم تراب جدمك..

                     يل بيك ريحة من الإمام

                                   1995

ليلة

ليلة.. كلت تعود إلي وتانيت

حنيّتْ بيباني.. وزرعت اللوز بالعتبة

وشعلت شموع وتوضيت..

كلت أصلي لك فرض..

                          لو جيت

                                 1995

مو بحر

هذا البحر... مو بحر

هذا.... دمّي المسفوح

وهذي السفن مو سفن

هذي مراكب نوح

دم أهلي هذا البحر

من نينوى.. من أكد

من أور.. من آشور

من أول التاريخ لليوم

دم أهلي مهدور!.

هذا البحر.. مو بحر

هذا البحر جذاب

هذي السفينة جذب

وهذي المراكب جذب

هذا البحر تابوت

دم أهلي هذا البحر

دم اهلي ياقوت

من أور من آشور

من نينوى من أكد

من أول التاريخ لليوم

بس العراقي يموت

                      2000